Jean Cousin le Jeune, Portrait de Joachim du Bellay
[...] L'autre jour en dormant (comme une vaine idole
Qui deça qui dela au gré du vent s'en volle)
M'aparut du Bellay non pas tel qu'il estoit
Quand son vers doucereux les Princes arrestoit,
Et qu'il faisoit courir la France apres sa lyre,
Qui encore sur tous le pleint et le desire :
Mais have et descharné, planté sur de grands os.
Ses costes, sa carcasse et l'espine du dos
Estoyent veufves de chair, et sa diserte bouche,
Où jadiz se logeoit la mieilliere mouche,
Les Graces et Pithon, fut sans langue et sans dens,
Et ses yeux, qui estoyent si promps et si ardans
A voir dancer le bal des neuf doctes pucelles,
Estoyent sans blanc, sans noir, sans clarté ny prunelles,
Et sa teste, qui fut le Caballin coupeau,
Avoit le nez retraict, sans cheveux, et sans peau,
Point de forme d'oreille, et la creuse ouverture
De son ventre n'estoit que vers et pourriture.
Trois fois je le voulu en songes embrasser,
Et trois fois s'enfuyant ne se voulut laisser
Presser entre mes bras : et son umbre seulette
Volloit de place en place, ainsi qu'une alouette
Volle devant le chien, lequel la va suivant,
Et en pensant la prendre, il ne prent que du vent.
A la fin en ouvrant sa bouche morne et palle,
Fist sortir une voix comme d'une cygalle,
D'un petit gresillon, ou d'un petit poullet,
Quand bien loing de sa mere il pepie seullet.
Et me disoit : "Ronsard, que sans tache d'envye
J'aymé, quand je vivois, comme ma propre vie,
Qui premier me poussas et me formas la voix
A celebrer l'honneur du langage François,
Et compaignon d'un art, tu me monstras l'adresse
De me laver la bouche es ondes de Permesse :
Puis qu'il a pleu à Dieu me prendre devant toy,
Entends ceste leçon et la retiens de moy.
Crains Dieu sur toute chose, et jour et nuict medite
En la loy que son filz nous a laissée ecripte :
Ton esperance apres, et de corps et d'esprit,
Soit fermement fichée au sauveur Jesuchrist :
Obeis à ton Prince, et au bras de Justice,
Et fais à tes amis et plaisir et service :
Contente toy du tien, et ne sois desireux
De biens ny de faveurs, et tu seras heureux.
Quand au monde où tu es, ce n'es qu'une chimere,
Qui te sert de marastre en lieu de douce mere :
Tout y va par fortune et par opinion,
Et rien n'y est durable en parfaicte union.
Dieu ne change jamais : l'homme n'est que fumée
Qu'un petit traict de feu tient un jour allumée.
Bien heureux est celuy qui n'y vit longuement,
Et celuy qui sans nom vit si obscurement,
Qu'à peine est il cogneu de ceux de son vilage,
Celuy, amy Ronsard, celuy est le plus sage.
Sy aux esprits des mors tu veux adjouster foy,
Qui ne sont plus menteurs, Ronsard, retires toy,
Vy seul en ta maison, et ja grison delaisse
A suivre plus la court, ta Circe enchanteresse.
Quand aux champs où je suis, nous sommes tous egaux,
Les Manes des grands Rois et des hommes ruraux,
Des bouviers, des soldans, et des princes d'Asie,
Errent egallement selon leur fantaisie,
Qui deça qui dela en plaisir s'esbattant
Va de verger en autre à son gré volletant,
Simple, gresle et leger, comme on voit les avettes
Voller parmy voz prez sur les jeunes fleurettes.
Entre Homere et Virgille, ainsi qu'un demy dieu,
Environné d'esprits, j'ay ma place au meillieu,
Et suis en la façon que m'a decrit Masures,
Aux champs Elisians, aymé des ames pures
Des vaillans demy-dieux, et du prince Henry (1),
Qui se cachant sa playe erre seul et marry,
Dequoy la dure Parque a sans pitié ravie
Tout d'un coup son repos, son plaisir et sa vie.
Et j'erre comme luy de tristesse blessé,
Qui sans te dire à Dieu si tost je te laissé,
Et sans prendre congé de toute nostre bande,
A qui leur du Bellay par toy se recommande."
Ainsi dit ceste idolle, et comme un pront esclair
Dans la nue se pert, se perdit dedans l'air.
(1) Il s'agit bien sûr du roi de France Henri II
Pierre de Ronsard, extrait de "Elégie à Loïs des Masures" (1560), dans Discours, derniers vers
[...] L'autre jour en dormant (comme une vaine idole
Qui deça qui dela au gré du vent s'en volle)
M'aparut du Bellay non pas tel qu'il estoit
Quand son vers doucereux les Princes arrestoit,
Et qu'il faisoit courir la France apres sa lyre,
Qui encore sur tous le pleint et le desire :
Mais have et descharné, planté sur de grands os.
Ses costes, sa carcasse et l'espine du dos
Estoyent veufves de chair, et sa diserte bouche,
Où jadiz se logeoit la mieilliere mouche,
Les Graces et Pithon, fut sans langue et sans dens,
Et ses yeux, qui estoyent si promps et si ardans
A voir dancer le bal des neuf doctes pucelles,
Estoyent sans blanc, sans noir, sans clarté ny prunelles,
Et sa teste, qui fut le Caballin coupeau,
Avoit le nez retraict, sans cheveux, et sans peau,
Point de forme d'oreille, et la creuse ouverture
De son ventre n'estoit que vers et pourriture.
Trois fois je le voulu en songes embrasser,
Et trois fois s'enfuyant ne se voulut laisser
Presser entre mes bras : et son umbre seulette
Volloit de place en place, ainsi qu'une alouette
Volle devant le chien, lequel la va suivant,
Et en pensant la prendre, il ne prent que du vent.
A la fin en ouvrant sa bouche morne et palle,
Fist sortir une voix comme d'une cygalle,
D'un petit gresillon, ou d'un petit poullet,
Quand bien loing de sa mere il pepie seullet.
Et me disoit : "Ronsard, que sans tache d'envye
J'aymé, quand je vivois, comme ma propre vie,
Qui premier me poussas et me formas la voix
A celebrer l'honneur du langage François,
Et compaignon d'un art, tu me monstras l'adresse
De me laver la bouche es ondes de Permesse :
Puis qu'il a pleu à Dieu me prendre devant toy,
Entends ceste leçon et la retiens de moy.
Crains Dieu sur toute chose, et jour et nuict medite
En la loy que son filz nous a laissée ecripte :
Ton esperance apres, et de corps et d'esprit,
Soit fermement fichée au sauveur Jesuchrist :
Obeis à ton Prince, et au bras de Justice,
Et fais à tes amis et plaisir et service :
Contente toy du tien, et ne sois desireux
De biens ny de faveurs, et tu seras heureux.
Quand au monde où tu es, ce n'es qu'une chimere,
Qui te sert de marastre en lieu de douce mere :
Tout y va par fortune et par opinion,
Et rien n'y est durable en parfaicte union.
Dieu ne change jamais : l'homme n'est que fumée
Qu'un petit traict de feu tient un jour allumée.
Bien heureux est celuy qui n'y vit longuement,
Et celuy qui sans nom vit si obscurement,
Qu'à peine est il cogneu de ceux de son vilage,
Celuy, amy Ronsard, celuy est le plus sage.
Sy aux esprits des mors tu veux adjouster foy,
Qui ne sont plus menteurs, Ronsard, retires toy,
Vy seul en ta maison, et ja grison delaisse
A suivre plus la court, ta Circe enchanteresse.
Quand aux champs où je suis, nous sommes tous egaux,
Les Manes des grands Rois et des hommes ruraux,
Des bouviers, des soldans, et des princes d'Asie,
Errent egallement selon leur fantaisie,
Qui deça qui dela en plaisir s'esbattant
Va de verger en autre à son gré volletant,
Simple, gresle et leger, comme on voit les avettes
Voller parmy voz prez sur les jeunes fleurettes.
Entre Homere et Virgille, ainsi qu'un demy dieu,
Environné d'esprits, j'ay ma place au meillieu,
Et suis en la façon que m'a decrit Masures,
Aux champs Elisians, aymé des ames pures
Des vaillans demy-dieux, et du prince Henry (1),
Qui se cachant sa playe erre seul et marry,
Dequoy la dure Parque a sans pitié ravie
Tout d'un coup son repos, son plaisir et sa vie.
Et j'erre comme luy de tristesse blessé,
Qui sans te dire à Dieu si tost je te laissé,
Et sans prendre congé de toute nostre bande,
A qui leur du Bellay par toy se recommande."
Ainsi dit ceste idolle, et comme un pront esclair
Dans la nue se pert, se perdit dedans l'air.
(1) Il s'agit bien sûr du roi de France Henri II
Pierre de Ronsard, extrait de "Elégie à Loïs des Masures" (1560), dans Discours, derniers vers
0 commentaires:
Enregistrer un commentaire